ഐപിഎൽ താരലേലത്തിൽ ഏറ്റവും വലിയ ഞെട്ടൽ സൃഷ്ടിച്ചത് കെ.എൽ. രാഹുലിന്റെ ഡൽഹി ക്യാപിറ്റൽസിലേക്കുള്ള മാറ്റമായിരുന്നു. 14 കോടി രൂപയ്ക്കാണ് രാഹുലിനെ ഡൽഹി സ്വന്തമാക്കിയത്. ലേലത്തിൽ രാഹുലിനായി ഏറ്റവും അധികം പ്രതീക്ഷിച്ചത് റോയൽ ചാലഞ്ചേഴ്സ് ബെംഗളൂരു ആരാധകരായിരുന്നു. കർണാടക സ്വദേശിയായ രാഹുലിനെ സ്വന്തമാക്കാൻ ആർസിബിക്ക് തീരെ താൽപര്യമില്ലായിരുന്നുവെന്നത് ആരാധകർക്ക് വലിയ ഞെട്ടലായി.
KLassy entry toh banti hai boss 🙌😎 pic.twitter.com/1U9MIU94xb
— Delhi Capitals (@DelhiCapitals) November 24, 2024
രാഹുലിന്റെ പേര് ലേലത്തിൽ വിളിച്ചപ്പോൾ കൊൽക്കത്തയും ബെംഗളൂരുവുമായിരുന്നു മത്സരത്തിൽ. 10.5 കോടിയിൽ എത്തിയപ്പോൾ അപ്രതീക്ഷിതമായി ആർസിബി പിൻവാങ്ങി. 74.25 കോടി രൂപയോളം കയ്യിലിരിക്കെയായിരുന്നു ഈ തീരുമാനം. ഇതോടെ രാഹുലിനെ സ്വന്തമാക്കാൻ ഡൽഹി ക്യാപിറ്റൽസിന് അവസരം ലഭിച്ചു.
രാഹുലിനെ നിലനിർത്താൻ ലക്നൗ സൂപ്പർ ജയന്റ്സിന് താൽപര്യമുണ്ടായിരുന്നില്ല. കഴിഞ്ഞ സീസണിൽ പ്ലേ ഓഫിൽ എത്താൻ കഴിയാതിരുന്നതിനെ തുടർന്നാണ് ഈ തീരുമാനം. കഴിഞ്ഞ വർഷം ഒരു തോൽവിക്കു ശേഷം രാഹുലിനെ ടീം ഉടമ സഞ്ജീവ് ഗോയങ്ക പരസ്യമായി വിമർശിച്ചതും വലിയ വിവാദമായിരുന്നു.
ആർസിബിക്കു വേണ്ടി മുൻപ് തിളങ്ങിയിട്ടുള്ള താരമാണു രാഹുൽ. ഡൽഹി ക്യാപിറ്റൽസിന്റെ പുതിയ ക്യാപ്റ്റനായി രാഹുലിനെ പ്രഖ്യാപിക്കുമെന്നാണ് പ്രതീക്ഷിക്കുന്നത്. രാഹുലിന്റെ നേതൃത്വത്തിൽ ഡൽഹി ക്യാപിറ്റൽസ് ഐപിഎല്ലിൽ മികച്ച പ്രകടനം നടത്തുമെന്നാണ് ആരാധകർ പ്രതീക്ഷിക്കുന്നത്
