കൊൽക്കത്ത: പത്താം സീസണിലെ നാലാം വിജയത്തിനായി കൊമ്പന്മാർ ഇന്നിറങ്ങുന്നു. എതിരാളികൾ കൊൽക്കത്തൻ വമ്പന്മാരായ ഈസ്റ്റ് ബംഗാൾ എഫ് സി. സീസണിലെ ആറാം മത്സരത്തിൽ വിജയതുടർച്ച പ്രതീക്ഷിച്ചാണ് ബ്ലാസ്റ്റേഴ്‌സ് ഈസ്റ്റ് ബംഗാളുമായി കൊമ്പുകോർക്കാനിറങ്ങുന്നത്. ഈസ്റ്റ് ബംഗാളിന്റെ ഹോം ഗ്രൗണ്ടായ സാൾട്ട് ലേക്ക് സ്റ്റേഡിയത്തിൽ രാത്രി ഏട്ടിനാണ് മത്സരം. കഴിഞ്ഞ മത്സരത്തില്‍ ഒഡിഷ എഫ്‌‌സിയെ ബ്ലാസ്റ്റേഴ്‌സ് തോല്‍പിച്ചിരുന്നു. നാലാം ജയത്തിനായി കേരള ബ്ലാസ്റ്റേഴ്‌സ് ഇറങ്ങുമ്പോള്‍ സീസണിലെ ആദ്യ ക്ലീൻഷീറ്റിനായാണ് ഈസ്റ്റ് ബംഗാള്‍ സ്വന്തം തട്ടകത്തില്‍ ഇറങ്ങുന്നത്. കൊച്ചിയിൽ കഴിഞ്ഞ കളിയില്‍ ഒഡിഷക്കെതിരെ ജയം പൊരുതി നേടിയ മഞ്ഞപ്പട സീസണില്‍ രണ്ടാം തവണ മാത്രമാണ് എവേ ഗ്രൗണ്ടിൽ ഇറങ്ങുന്നത്. പ്രബീർ ദാസ് ഒഴികെ എല്ലാവരും മത്സരത്തിന് സജ്ജമാണെന്ന് ബ്ലാസ്റ്റേഴ്‌സ് പരിശീലകന്‍ ഇവാന്‍ വുകോമനോവിച്ച് വ്യക്തമാക്കി. ഈസ്റ്റ് ബംഗാളിനെതിരെ ബ്ലാസ്റ്റേഴ്‌സ് ദിമിത്രിയോസ് ഡയമന്‍റാകോസിനെ ആദ്യ ഇലവനിൽ ഇറക്കിയേക്കും. മുമ്പ് ബ്ലാസ്റ്റേഴ്സിന്റെ താരങ്ങളായിരുന്ന ഹര്‍മന്‍ജ്യോത് ഖബ്രയും പ്രഭ്‌സുഖന്‍ ഗില്ലും കൊല്‍ക്കത്ത ക്യാംപിലുണ്ട്. ക്യാപ്റ്റൻ ലുണയുടെ മിന്നും ഫോമിലാണ് ആരാധകരുടെ പ്രതീക്ഷ. കളിച്ച എല്ലാ മത്സരങ്ങളിലും ഗംഭീര പ്രകടനം ആണ് ബ്ലാസ്റ്റേഴ്സിന്റെ ഉറുഗ്വായൻ താരം പുറത്തെടുത്തത്. അവസാന മത്സരത്തില്‍ ഒഡിഷ എഫ്‌സിക്കെതിരെ കേരള ബ്ലാസ്റ്റേഴ്‌സ് ശക്തമായ തിരിച്ചുവരവില്‍ 2-1ന്‍റെ ജയം സ്വന്തമാക്കിയിരുന്നു. ഇത് കഴിഞ്ഞ സീസണിനൊടുവില്‍ ലഭിച്ച സസ്‌പെന്‍ഷന്‍ കഴിഞ്ഞ് ബ്ലാസ്റ്റേഴ്‌സ് കോച്ച് ഇവാന്‍ വുകോമനോവിച്ച് മഞ്ഞപ്പടയിലേക്ക് തിരിച്ചെത്തിയ മത്സരം കൂടിയായിരുന്നു. ആദ്യ പകുതിയില്‍ പിറകിലായ ബ്ലാസ്റ്റേഴ്‌സ് രണ്ടാം പാതിയില്‍ രണ്ട് ഗോള്‍ നേടി തിരിച്ചെത്തുകയായിരുന്നു. ദിമിത്രിയോസ് ഡയമന്‍റാകോസ്, അഡ്രിയാന്‍ ലൂണ എന്നിവരാണ് ബ്ലാസ്റ്റേഴ്‌സിനായി ഗോളുകള്‍ നേടിയത്. അഞ്ച് കളികളില്‍ 10 പോയിന്‍റുമായി അഞ്ചാം സ്ഥാനത്താണ് കേരളാ ബ്ലാസ്റ്റേഴ്‌സ് ഇപ്പോള്‍. നാല് പോയിന്‍റ് മാത്രമുള്ള ഈസ്റ്റ് ബംഗാള്‍ ഒന്‍പതാമത് നിൽക്കുന്നു
