ടെസ്റ്റ് ക്രിക്കറ്റിൽ ഒരു കലണ്ടർ വർഷത്തിൽ ഏറ്റവും കൂടുതൽ സിക്സുകൾ അടിച്ച താരമെന്ന പുതിയ റെക്കോർഡ് ഇന്ത്യൻ യുവ താരം യശസ്വി ജയ്സ്വാളിന്റെ പേരിൽ. ഓസ്ട്രേലിയയ്ക്കെതിരായ പെർത്ത് ടെസ്റ്റിൽ 34-ാം സിക്സർ പറത്തിയാണ് ജയ്സ്വാൾ ഈ നേട്ടം കൈവരിച്ചത്. ഇതോടെ 2014-ൽ 33 സിക്സുകൾ നേടിയ ന്യൂസീലൻഡ് മുൻ താരം ബ്രണ്ടൻ മക്കല്ലത്തിന്റെ റെക്കോർഡ് മറികടന്നു.
കേവലം 12 ടെസ്റ്റ് മത്സരങ്ങളിൽനിന്നാണ് ജയ്സ്വാൾ ഈ നേട്ടം കൈവരിച്ചത്. താരം ഇതുവരെ 1407 റൺസ് നേടിയിട്ടുണ്ട്, അതിൽ മൂന്ന് സെഞ്ചുറികളും ഉൾപ്പെടും. 2022-ൽ 26 സിക്സുകൾ നേടിയ ഇംഗ്ലണ്ട് ടെസ്റ്റ് ടീം ക്യാപ്റ്റൻ ബെൻ സ്റ്റോക്സാണ് പട്ടികയിലെ മൂന്നാം സ്ഥാനക്കാരൻ. 2005-ൽ 22 സിക്സുകൾ നേടിയ ഓസീസ് മുൻ താരം ആദം ഗിൽക്രിസ്റ്റ് നാലാമതുമുണ്ട്.
Jaiswal - 90* (193).
— Mufaddal Vohra (@mufaddal_vohra) November 23, 2024
KL Rahul - 62* (153).
- INDIA 172/0 WITH A LEAD OF 218 RUNS - THE DAY BELONGS TO KL & JAISWAL. 🙇♂️🇮🇳 pic.twitter.com/7VJTlzHj7w
പെർത്ത് ടെസ്റ്റിന്റെ രണ്ടാം ഇന്നിങ്സിൽ 193 പന്തുകൾ നേരിട്ട ജയ്സ്വാൾ 90 റൺസുമായി പുറത്താകാതെ നിന്നു. രണ്ടു സിക്സുകളും ഏഴു ഫോറുകളുമാണ് ജയ്സ്വാൾ രണ്ടാം ഇന്നിങ്സിൽ അടിച്ചത്. മത്സരത്തിന്റെ ആദ്യ ഇന്നിങ്സിൽ താരം റണ്ണൊന്നുമെടുക്കാതെ പുറത്തായിരുന്നു.
കഴിഞ്ഞ വർഷം ജൂലൈയിൽ വെസ്റ്റിൻഡീസിനെതിരായ പരമ്പരയിലാണ് ജയ്സ്വാൾ ടെസ്റ്റ് അരങ്ങേറ്റം കുറിച്ചത്. ഏതാനും കളികൾകൊണ്ട് തന്നെ ഓപ്പണിങ് റോളിൽ ക്യാപ്റ്റൻ രോഹിത് ശർമയ്ക്കൊപ്പം ഇന്ത്യയുടെ വിശ്വസ്തനായ ബാറ്ററായി മാറാൻ ജയ്സ്വാളിനു സാധിച്ചു.
തന്റെ ഏറ്റവും പുതിയ നേട്ടത്തോടെ, യശസ്വി ജയ്സ്വാൾ ടെസ്റ്റ് ക്രിക്കറ്റിൽ ഒരു പുതിയ തലമുറയുടെ ഉദയത്തെ സൂചിപ്പിക്കുന്നു. അദ്ദേഹത്തിന്റെ ആക്രമണാത്മക ബാറ്റിംഗ് ശൈലിയും സമർത്ഥമായ ഷോട്ട് സെലക്ഷനും ഇന്ത്യൻ ക്രിക്കറ്റ് ടീമിന് വലിയ ആനുകൂല്യമാണ്. വരും കാലങ്ങളിൽ ഈ താരം ഇന്ത്യൻ ക്രിക്കറ്റിന് വേണ്ടി നിരവധി നേട്ടങ്ങൾ കൈവരിക്കുമെന്ന് പ്രതീക്ഷിക്കാം
