ഇംഗ്ലണ്ട് ക്രിക്കറ്റ് ബോർഡ്, തങ്ങളുടെ താരങ്ങൾ വിദേശ ക്രിക്കറ്റ് ലീഗുകളിൽ കളിക്കുന്നതിന് കടുത്ത നിയന്ത്രണങ്ങൾ ഏർപ്പെടുത്തിയിരിക്കുന്നു. ഇനിമുതൽ ഇംഗ്ലണ്ടിലെ ആഭ്യന്തര സീസണിനിടയിൽ ഇംഗ്ലീഷ് താരങ്ങൾക്ക് പാക്കിസ്ഥാൻ സൂപ്പർ ലീഗ്, ശ്രീലങ്ക പ്രീമിയർ ലീഗ് തുടങ്ങിയ വിദേശ ലീഗുകളിൽ പങ്കെടുക്കാൻ അനുമതി ഉണ്ടായിരിക്കില്ല.
ഇംഗ്ലണ്ടിലെ കൗണ്ടി ചാംപ്യൻഷിപ്, വൈറ്റാലിറ്റി ബ്ലാസ്റ്റ്, ദ് ഹണ്ട്രഡ് എന്നീ ആഭ്യന്തര ലീഗുകളെ കൂടുതൽ ജനകീയമാക്കുക എന്നതാണ് ഈ നിയമത്തിന്റെ ലക്ഷ്യം. ഇംഗ്ലണ്ടിന്റെ പ്രധാന താരങ്ങളെ ആഭ്യന്തര ലീഗുകളിൽ കേന്ദ്രീകരിക്കുന്നതിലൂടെ, ഈ ലീഗുകൾക്ക് കൂടുതൽ പ്രേക്ഷകരെ ആകർഷിക്കാനാകും.
🚨 BIG BREAKING 🚨 NO ENGLISH PLAYERS IN PSL 2025
— Richard Kettleborough (@RichKettle07) November 29, 2024
- ECB has banned it's players from playing in any franchise league expect (IPL) during the English Domestic Season.
- The decision was taken to preserve the quality and competitiveness of England’s Domestic Cricket. pic.twitter.com/pBCqePXaky
ഒരു താരത്തിന് ഒരേ സമയം രണ്ട് ടീമുകളുടെ ഭാഗമാകുന്നത് തടയുന്നതിനും ഇംഗ്ലണ്ട് ബോർഡ് നടപടികൾ സ്വീകരിച്ചിട്ടുണ്ട്. ഉദാഹരണത്തിന്, ഒരേ സമയം നടക്കുന്ന രണ്ട് ലീഗുകളിൽ ഒരു താരത്തിന് ഒരു ടീമിൽ മാത്രമേ കളിക്കാൻ അനുമതിയുള്ളൂ. ഒരു ലീഗിലെ ടീം നേരത്തേ ടൂർണമെന്റിൽ നിന്നു പുറത്തായാൽ മാത്രമേ മറ്റൊരു ലീഗിൽ കളിക്കാൻ അനുമതി ലഭിക്കൂ.
ഫസ്റ്റ് ക്ലാസ് ക്രിക്കറ്റ് കളിക്കാൻ ഇംഗ്ലിഷ് ബോർഡുമായി കരാറുള്ള താരങ്ങൾക്കു പോലും വിദേശ ലീഗുകളിൽ കളിക്കാൻ എൻഒസി ലഭിക്കില്ല. കഴിഞ്ഞ വർഷം 74 ഇംഗ്ലണ്ട് താരങ്ങൾ വിവിധ വിദേശ ക്ലബ്ബുകളിൽ കളിച്ചിരുന്നു.
എന്നാൽ, ഇന്ത്യൻ പ്രീമിയർ ലീഗ് സീസൺ സാധാരണയായി ഏപ്രിൽ-മേയ് മാസങ്ങളിൽ നടക്കുന്നതിനാൽ, ഈ സമയത്ത് ഇംഗ്ലണ്ട് താരങ്ങൾക്ക് ഇളവുകൾ നൽകും. അതായത്, ഐപിഎല്ലിൽ ഇംഗ്ലണ്ട് താരങ്ങൾക്ക് കളിക്കാൻ അനുമതി ഉണ്ടായിരിക്കും.
