തിരുവനന്തപുരം: കെസിഎൽ പോരാട്ടങ്ങളിൽ വിജയപാതയിലേക്ക് ഗംഭീരമായി തിരിച്ചെത്തി കൊല്ലം സെയ്ലേഴ്സ്. ആവേശം നിറഞ്ഞ മത്സരത്തിൽ തൃശൂർ ടൈറ്റൻസിനെതിരെ എട്ട് വിക്കറ്റിന്റെ ആധികാരിക വിജയമാണ് കൊല്ലം സ്വന്തമാക്കിയത്. വെറും 14.1 ഓവറിൽ തൃശൂർ ഉയർത്തിയ 144 റൺസ് വിജയലക്ഷ്യം മറികടന്ന് കൊല്ലം കാണികളെ ആവേശത്തിലാഴ്ത്തി. വെടിക്കെട്ട് ബാറ്റിങ്ങിലൂടെ 86 റൺസടിച്ച വിഷ്ണു വിനോദാണ് കളിയിലെ താരമായി മാറിയത്.
ടോസ് നേടി ബാറ്റിങ്ങിനിറങ്ങിയ തൃശൂർ ടൈറ്റൻസിന്റെ തുടക്കം മികച്ചതായിരുന്നു. എന്നാൽ, കഴിഞ്ഞ മത്സരങ്ങളിലെ താരമായിരുന്ന അഹമ്മദ് ഇമ്രാൻ 16 റൺസെടുത്ത് പുറത്തായത് അവർക്ക് തിരിച്ചടിയായി. മികച്ച ഫോമിലായിരുന്ന ആനന്ദ് കൃഷ്ണൻ (41 റൺസ്) തൃശൂരിന് പ്രതീക്ഷ നൽകിയെങ്കിലും, കൃത്യമായ ഇടവേളകളിൽ വിക്കറ്റുകൾ വീഴ്ത്തി കൊല്ലം ബൗളർമാർ തൃശൂരിന്റെ സ്കോറിങ് വേഗം കുറച്ചു. അജയഘോഷ് (4 വിക്കറ്റ്), അമൽ എ.ജി (3 വിക്കറ്റ്), ഷറഫുദ്ദീൻ (2 വിക്കറ്റ്) എന്നിവരുടെ നേതൃത്വത്തിലുള്ള ബൗളിങ് ആക്രമണത്തിൽ തൃശൂർ 19.5 ഓവറിൽ 144 റൺസിന് ഓൾ ഔട്ടായി.
വിഷ്ണു വിനോദ് കൊടുങ്കാറ്റായി
മറുപടി ബാറ്റിങ്ങിനിറങ്ങിയ കൊല്ലത്തിന് തുടക്കത്തിൽത്തന്നെ അഭിഷേക് ജെ നായരെ നഷ്ടമായെങ്കിലും, ക്രീസിലെത്തിയ വിഷ്ണു വിനോദ് കളി ഗതി മാറ്റിമറിച്ചു. തൃശൂർ ബൗളർമാർക്കെതിരെ ആഞ്ഞടിച്ച വിഷ്ണു വെറും 22 പന്തിൽ അർധസെഞ്ചുറി പൂർത്തിയാക്കി. ക്യാപ്റ്റൻ സിജോമോൻ ജോസഫ് എറിഞ്ഞ ഒൻപതാം ഓവറിൽ നാല് സിക്സറുകൾ പറത്തി വിഷ്ണു കാണികളെ ആവേശത്തിന്റെ കൊടുമുടിയിലെത്തിച്ചു. 38 പന്തുകളിൽ നിന്ന് 7 ഫോറും 8 സിക്സും സഹിതം 86 റൺസ് നേടിയാണ് വിഷ്ണു മടങ്ങിയത്.
വിഷ്ണുവിന്റെ പുറത്താകലിനുശേഷം സച്ചിൻ ബേബിയും എം.എസ്. അഖിലും ചേർന്ന് കൊല്ലത്തെ വിജയത്തിലെത്തിച്ചു. സച്ചിൻ ബേബി 32 റൺസും, അഖിൽ 19 റൺസും നേടി പുറത്താകാതെ നിന്നു. ഈ തകർപ്പൻ വിജയത്തോടെ പോയിന്റ് പട്ടികയിൽ മുന്നേറാൻ കൊല്ലം സെയ്ലേഴ്സിന് കഴിഞ്ഞു.
