കെസിഎൽ ക്രിക്കറ്റ് ലീഗിൽ ആവേശം നിറഞ്ഞ മത്സരത്തിൽ കൊല്ലം സെയിലേഴ്‌സിനെതിരെ ആലപ്പി റിപ്പിൾസിന് 2 റൺസ് വിജയം. ആദ്യം ബാറ്റ് ചെയ്ത ആലപ്പി റിപ്പിൾസ് നിശ്ചിത 20 ഓവറിൽ 6 വിക്കറ്റ് നഷ്ടത്തിൽ 182 റൺസെടുത്തപ്പോൾ, മറുപടി ബാറ്റിംഗിനിറങ്ങിയ കൊല്ലത്തിന് 9 വിക്കറ്റ് നഷ്ടത്തിൽ 180 റൺസ് മാത്രമാണ് നേടാനായത്. ബാറ്റിംഗിലും ബൗളിംഗിലും ഒരുപോലെ തിളങ്ങിയ യുവതാരം മുഹമ്മദ് ഇനാനാണ് പ്ലെയർ ഓഫ് ദി മാച്ച്.
അലപ്പിക്ക് മികച്ച തുടക്കം
ടീം ക്യാപ്റ്റൻ മുഹമ്മദ് അസറുദ്ദീനും ജലജ് സക്സേനയും ചേർന്ന് ആലപ്പിക്ക് മികച്ച തുടക്കമാണ് നൽകിയത്. പതിവിൽ നിന്ന് വ്യത്യസ്തമായി കൂറ്റൻ ഷോട്ടുകളിലൂടെ സ്കോർ ഉയർത്തിയത് ജലജ് സക്സേനയായിരുന്നു. ഓപ്പണിംഗ് വിക്കറ്റിൽ ഇരുവരും ചേർന്ന് 61 റൺസ് കൂട്ടിച്ചേർത്തു. 24 റൺസെടുത്ത അസറുദ്ദീൻ പുറത്തായ ശേഷം ക്രീസിലെത്തിയ അഭിഷേക് പി നായർ, മുഹമ്മദ് കൈഫ്, അക്ഷയ് ടി കെ എന്നിവർക്ക് വലിയ സ്കോർ കണ്ടെത്താനായില്ല. എന്നാൽ, മറുവശത്ത് തകർത്തുകളിച്ച ജലജ് സക്സേനയുടെ ഇന്നിംഗ്സ് ആലപ്പിക്ക് വലിയ കരുത്തായി. 50 പന്തുകളിൽ 9 ഫോറും 4 സിക്സുമടക്കം 85 റൺസാണ് സക്സേന നേടിയത്.
അവസാന ഓവറുകളിൽ തകർത്തടിച്ച കെ എ അരുണും മുഹമ്മദ് ഇനാനും ചേർന്ന കൂട്ടുകെട്ടാണ് ടീം സ്കോർ 182-ൽ എത്തിച്ചത്. ടൂർണമെന്റിലെ ആദ്യ മത്സരം കളിക്കാനിറങ്ങിയ ഇന്ത്യൻ അണ്ടർ 19 താരം കൂടിയായ മുഹമ്മദ് ഇനാൻ, 9 പന്തിൽ 2 ഫോറും 2 സിക്സുമടക്കം 21 റൺസ് നേടി ശ്രദ്ധേയമായ പ്രകടനം കാഴ്ചവെച്ചു. കെ എ അരുൺ 10 റൺസുമായി പുറത്താകാതെ നിന്നു. കൊല്ലത്തിന് വേണ്ടി ഷറഫുദ്ദീൻ, എം എസ് അഖിൽ, എ ജി അമൽ, അജയഘോഷ് എന്നിവർ ഓരോ വിക്കറ്റ് വീതം വീഴ്ത്തി.
കൊല്ലത്തിന് പിഴച്ച ബാറ്റിംഗ്
183 റൺസ് വിജയലക്ഷ്യം പിന്തുടർന്ന് ബാറ്റിംഗിനിറങ്ങിയ കൊല്ലം സെയിലേഴ്‌സിന്റെ കരുത്തുറ്റ ബാറ്റിംഗ് നിരയ്ക്ക് തുടക്കത്തിൽ തന്നെ പിഴച്ചു. രണ്ടാം ഓവറിൽ അഭിഷേക് ജെ നായർ പുറത്തായി. പതിവ് ബാറ്റിംഗ് വെടിക്കെട്ടിന് പേരുകേട്ട വിഷ്ണു വിനോദിനെയും സച്ചിൻ ബേബിയെയും ഒരേ ഓവറിൽ മടക്കി രാഹുൽ ചന്ദ്രൻ ആലപ്പിക്ക് മേൽക്കൈ നൽകി. വിഷ്ണു വിനോദ് 22 റൺസും സച്ചിൻ ബേബി 18 റൺസും നേടി. വത്സൽ ഗോവിന്ദ് (13), എം എസ് അഖിൽ (14), സച്ചിൻ പി.എസ് (18), രാഹുൽ ശർമ്മ (16) എന്നിവർക്കും ക്രീസിൽ നിലയുറപ്പിക്കാനായില്ല.
അവസാന ഓവറുകളിൽ തകർപ്പൻ ഷോട്ടുകളുമായി ഷറഫുദ്ദീൻ കൊല്ലത്തിന് പ്രതീക്ഷ നൽകിയെങ്കിലും, അവസാന ഓവറിലെ നാലാം പന്തിൽ അദ്ദേഹം പുറത്തായതോടെ ആലപ്പി റിപ്പിൾസ് വിജയം ഉറപ്പിച്ചു. 22 പന്തിൽ 1 ഫോറും 5 സിക്സുമടക്കം 41 റൺസാണ് ഷറഫുദ്ദീൻ നേടിയത്.
നാല് ഓവറിൽ 26 റൺസ് മാത്രം വഴങ്ങി മൂന്ന് വിക്കറ്റെടുത്ത രാഹുൽ ചന്ദ്രനാണ് ആലപ്പിയുടെ ബൗളിംഗ് നിരയിൽ തിളങ്ങിയത്. മുഹമ്മദ് ഇനാൻ 4 ഓവറിൽ 40 റൺസിന് 3 വിക്കറ്റെടുത്തു. ഈ വിജയത്തോടെ അഞ്ച് മത്സരങ്ങളിൽ നിന്ന് നാല് പോയിന്റുമായി ആലപ്പി റിപ്പിൾസ് അഞ്ചാം സ്ഥാനത്തേക്ക് ഉയർന്നു.
